Tags!

قبل أن نبدأ

- أسألكم الدعاء لأختنا سارة عادل المتوفاة حديثاً ، وقد علمت حينما سألت عن ظروف الوفاة أنها ماتت بعد صراع مع المرض بضعة أشهر ، وبعد عمرة أدتها قبل وفاتها بأسبوعين ، وأخيراً كانت العملية الجراحية التي قبض الله بعدها روحها

- أختي العزيزة مها .. صاحبة المدونة المتألقة فتات من كلام

قليلون هم البشر الذين يعيشون بقلوب أشبه بمستقبلات الذبذبات ، يستشعرون أدق المشاعر وأبسطها فيتفاعلون معها ويبدعون

أحسبك من هؤلاء.. حفظ الله لك نفسك المبدعة

-لستُ أدري لماذا يحب الإنسان الحديث عن نفسه ، ولماذا يغتبط باهتمام الآخرين بشخصه

هو كبرياء البشر واعتدادهم بأنفسهم ، أو فلنقل مرض في القلب يكسب المرء غروراً وعجباً

أعوذ بالله من العجب بالنفس ! فوالله لو يعلم الخلق نفسي وخطأها في حق باريها لما تورعوا عن ضربي بالنعال

*****

وصلني من أخوين فاضلين ما صرنا نعرفه باسم ( تاج ) ، وأصل الكلمة أجنبية بالطبع كما كتبتها في عنوان التدوينة تقال في لعبة أشبه

بالاستغماية بمعنى ( مسكتك ) .. وأنا ولله الحمد اتمسكت !

مع الوقت تم تعريب الكلمة فحملت معنى التاج على الرأس .

على فكرة هذا السر الخطير لم أعرفه بمفردي قطعاً ؛ بل قرأته في أحد المدونات ولا أذكر أين ، وأضناني البحث لأحفظ لصاحب الإيضاح حقه وأضع رابطاً لكلامه .. فأرجو ممن يعلم صاحب هذه التدوينة يرشدني لأحفظ حقه

وصلني تاج من الأخ الكريم حمزة صاحب مدونة حلمنا ، والآخر من د. كوول صاحب مدونة بادّن في مالطا

مش عارفة ليه الروابط عندي مش شغالة لذلك أضطر لوضع عنواني المدونتين على التوالي

http://7amzaonline.blogspot.com/

http://baddan-fee-malta.blogspot.com/

المهم بقى .. نبدأ باسم الله الإجابة عن الأسئلة

على فكرة الأسئلة اللي في تاج أخونا حمزة مكررة في تاج د. كول

فأنا هجاوب الاتنين مع بعض

انت مين ؟

كثيراً حين أسأل هذا السؤال يتبادر إلى ذهني بيت الشعر القائل :

أنا لا أنساكِ فلسطينُ** ويشد يشد بي البعدَ

أنا في أفيائكِ نسرينُ** أنا زهرُ الشوقِ ، أنا الوردُ

ومرة أخرى بيت الشعر الذي كنت أضعه سابقاً في البروفايل :

أنا مسلمٌ والمجد يقطر كالندى ** والعز كل العز في إيماني

وبعيداً عن الفذلكة ، أنا ببساطة بنت مسلمة ..شابة جامعية وإن كنت صاحبة قلب أشيب

لي طموحات وأحلام مجنونة لكنها مشروعة

مين أكتر 6 أشخاص بتحبهم ؟

اشمعنى 6؟ بجد والله اشمعنى ؟

ليه مش 10 مثلاً أو 4 ؟

المهم .. هقول ستة وأمري لله

في حاجات بديهيات طبعاً مش محتاجة أقول النبي - صلى الله عليه وسلم - ورسل الله أجمعين وماما وبابا وأخواتي

الأول

أمي

صحيح أمي من البديهيات ، لكن لو لم تكن أمي وكانت واحدة قريبتنا مثلاً كنت حطيتها من بين هؤلاء الستة

أمي صاحبتي لدرجة كبيرة الحمد لله غير إنها أصلاً ست زي العسل :)

الثاني

مها

أخت اتخرجت من كليتنا ، لها بعد الله علي فضل لا أحصيه في حاجات كتير قوي قوي

من الناس القلائل اللي بحس انهم ماشيين على خط مستقيم لا يحيدون عنه يمنة أو يسرة .. كتير بحس ان ربنا بيجري على لسانها الحق في أكثر من مرة

بجد والله لما بدعيلها بدعي لزوجها وأهلها وأخواتها شئت أم أبيت .. بحس إنها شخصية مباركة حتى في الدعاء

فيها ميزة مشفتهاش حتى الآن بصراحة في حد من الأحياء : عاقلة جداً وحكيمة وفي نفس الوقت عاطفية جداً وشديدة الحنان

أسأل الله أن يرزقها الذرية الصالحة

الثالث

منى

بحس إني خلفتها ونسيتها .. صديقتي وأختي وبنتي وكل اللي ممكن تتخيلوه

بجد بحس تجاهها زي الأم ما بتحس تجاه بنتها معرفش ليه على الرغم إنها معايا في الدفعة

الرابع

ريهام

من الناس القلائل اللي لما أكلمهم أحس إني بكلم نفسي ومش مضطرة أتكلف معاها في الحديث

مستمعة أكثر من ممتازة وناصحة أمينة

الخامس

إيمان

شخصية من عالم الأحلام .. في صحبتها بحس إن مفيش شر في الدنيا وإن الدنيا بلون الورد

السادس

هبة

رفيقة الدراسة والدعوة والنت وكل حاجة

انت سعيد؟

لا .. أنا سعيدة :)

الحمد لله أقدر أقول نعم .. مش معنى إحساس المرء بالضيق إنه مش سعيد

أنا بفضل الله مسلمة ، وأهلي بفضل الله عايشين وبحبهم ، وربنا من عليا بالالتزام أبقى سعيدة

كل شيء تمنيته دعوت الله فأعطانيه ، وأتقلب في نعمة الله صباح مساء أبقى سعيدة

لكن يبقى الافتقار للسلام الداخلي عامل مكدر لصفو السعادة

لو اجتمعت انا وحسني مبارك في غرفة واحدة؟

بجد .. مش عارفة أقول إيه وللا إيه

وللا أصلاً هعرف أتكلم وللا سيلجمني الخوف من المجهول

اللي متأكدة منه إني هبص له بقرف رغماً عني .. ولو استطعت النطق هقول :

" واتقوا يوماً ترجعون فيه إلى الله ثم توفى كل نفس ما كسبت وهم لا يظلمون "

لو معاك مليون ونص جنيه......تعمل بيهم ايه؟

برضه اشمعنى مليون ونص ؟؟ ليه مش مليون حاف وللا 2 مليون ؟

المهم

هدي نص مليون لوالدي .. الراجل صرف عليا دم قلبه وكفاية إنه مستحملني لحد دلوقتي

هحج أنا وأمي واخواتي .. بابا لأ لأنه حج قبل كدة

وممكن ناخده برضه ايه المانع ؟

هدي ماما ربع مليون وكل واحد من أخواتي 50 ألف

هشتري ميكروباص عشان نروح بيه أنا والأخوات الأفراح لأننا بنتبهدل في المواصلات وهتعلم السواقة

مممممم ايه كمان ؟

هحوش الباقي عشان أصرف على نفسي ودراستي

بتحب مصر؟

بحبها برقة وبعنف وعلى استحياء

مش هكمل القصيدة لأن الباقي شتايم :)

بحبها جداً جداً جداً .. أنا سافرت برة مصر وعشت سنين من حياتي في الخارج

والله مفيش أحسن من بلدنا .. كفاية إحساس الأمان

كفاية منظر النيل لما يملا عيني وأحس إن مفيش أجمل من كدة ..

بجد بحس في مصر إني في حضن أمي

على الرغم من الفساد الموجود بس والله بلدنا لسة بخير .. البلد دي فيها خير بإذن الله ليوم الدين

شعبها لسة فيه طيبة ومتلوثش زي بقية الشعوب

فيه غش آه .. سرقة واستغلال آه

بس لسة في القلوب طيبة مش موجودة عند أي حد في العالم

بتحب البنات؟

مش أنا بنت ؟ والمنطقي إني بحب نفسي ؟

يبقى بحب البنات :)

لا بجد .. أنا بيجيلي تخلف عقلي لما أشوف بنوتة صغنطوطة .. بحس إني رجعت عشرين سنة ورا عشان ألعب معاها

نفسي أوي ربنا يرزقني أول أبنائي بنت عشان تبقى صاحبتي

أصل البنات كائنات لطيفة وناعمة .. عكس الولاد

من يومهم كائنات متوحشة ومؤذية

انت مسلم ؟

الحمد لله رب العالمين

ليه؟

لأن ده الاختيار المنطقي لأي شخص عاقل

ولأن الفطرة بتقول كدة

ولأني ولدت في بيت مسلم

كنت زماااااااااااااان على 12 سنة مثلاً بفكر كتير في الإسلام وأمور العقيدة

وهداني تفكيري الطفولي للحقيقة الدامغة بفضل الله

لما كبرت شوية كنت بدرس في ثانوي خصائص رسالة الإسلام وتأكدت فعلاً من أعماقي إنه الحل للبشرية

اكتر شخصية ما تقدرش تستغنى عنها في حياتك؟ وليه؟

أمي .. بحس إنها سر ابتسامتي وسكينتي

لما كانت بتسافر كنت بحس بمعنى اليتم على الرغم إني معتمدة على نفسي لحد كبير

في ناس غيرها .. بس أمي أبرزهم

ايه اكتر موقف محرج اتعرضت ليه في حياتك؟واتصرفت ازاي؟

والله هي مواقف كتييييييييييييييييييييير

الحمد لله كل يوم والتاني بمر بموقف محرج

آخرهم قريب كنت رايحة أزور واحدة صاحبتي

بعدي الشارع وجاية أطلع على الرصيف كان مايل شوية وحذائي ناعم

توازني اختل سندت على صاحبتي بس اتزحلقت تاني وملحقتش أمسك نفسي فوقعت على ركبتي

كنا الحمد لله في محطة أوتوبيس ووقعت وسط الناس

عادي جدددددددداً

اتصرفت ازاي بقى ؟

قمت عايزة أعيط من الكسفة وعايزة أضحك من منظري في نفس الوقت

الحسنة إني موقعتش في المنطقة عند صاحبتي لأن الكل عارفين بعضهم وهيبقوا عارفين إن اللي وقعت صاحبة فلانة وحكايتي هتبقى حديث الأسبوع

الأمنية اللي بتدعي ربنا دايما انه يحققها لك؟

أختم حفظ القرآن في أقرب وقت لأني طولت أوي أوي أوي

*******

اسمك ؟

هو اسم شائع أوي من أسماء البنات

شوفوا انتوا بقى هبة وللا شيماء وللا منى

سنك ؟

هكمل ال22 على آخر السنة دي

إن شاء الله

برجك ؟؟

القوس

مجال دراستك ؟

pharmacy

اسم مدونتك ؟

نسيم الشوق

لماذا اخترته وما هي نيتك من وراء اختياره ؟

هو اسم نشيد لأحمد أبو خاطر

بحب النشيد جداً وكلماته عاجباني

بس مش ده سبب الاختيار ، السبب إن الاسم معبر عن طبيعة كتاباتي المتطلعة دائماً

شيء من التفصيل تجدونه في تدوينتي الأولى

صورتك الرمزية في المدونة بتعبر عن إيه ؟؟

الصورة دي كنت بتعلم عليها فوتوشوب تغيير لون العين والشعر

وأنا بلعب في عينيها حسيت فيها بمعاني مشتركة بيني وبينها

التفكير في الغد ، الحيرة ، حزن خفيف ، أمل مستتر

بحس إنها بتعبر عني لما بقف في الشباك بالليل

هل فكرت في اغلاق المدونة والسبب ؟

لا خالص .. هو أنا لحقت ؟

بعدين أنا بحب الكتابة جداً ، وبحب أشرك الآخرين ما أكتب

ايه رد فعلك لو حد قل ادبه في تعليق ؟

حسب نوع قلة الأدب :)

لو كلام فاحش أحذفه فوراً

للأسف تحت دعوى حرية التعبير في ناس بتسيب كلام ميصحش يتقال أصلاً

وهذا برأيي لا يصح لأن الحرية لها سقف

لوالحد ده ادى لنفسه حق التقريع والإهانة بدعوى النقد هاتعامل بالحسنى

زي ما سيدنا عمر كان مرة ماشي في المسجد ليلاً اتكعبل في واحد نايم راح الراجل قايل : هل أنت أعمى ؟

رد عمر ببساطة : لا

الراجل سأله سؤال رد عليه .. مفيش بقى انت مين عشان تكلمني كدة وأنا أمير المؤمنين ولا ولا ..

بس لا أنكر إني بتضايق .. وجداً كمان

اسوأ مدونة ؟

من غير تسمية .. في مدونات بتبقى هدفها جذب الناس وبتنجح في ذلك فعلاً على الرغم من سفه محتواها

هيحصل ايه للايميل بعد ما تموت ؟

هيتملي ايميلات غير مقروءة

وكلها شهر ويحصل صاحبته

اديت الباسوورد لحد قبل كده ؟

لا خالص .. بس اخواتي عارفينه محدش يسألني ازاي

السفر بالنسبة لك ؟

فرصة للخلوة مع الله

خصوصاً سفر البر

لا أنسى رحلة العمرة اللي عملتها وأنا في أولى ثانوي ، مكنتش الأولى بس كنت وقتها واعية عن قبل كدة

ياااااااااه .. لما الناس كانت تنام في الباص والنور يتقفل وأقعد أنا أتأمل في الجبال وأناجي الله

وللا لما كنا نقف في استراحة وقت الفجر وأتأمل شروق الشمس في الصحراء

قمة الجمال ، وقمة سمو الروح باتصالها بالله

الموووود بتاعك ايه ؟؟

الموود بتاعي ؟

غالباً بحب العزلة لما الدنيا تكون دوشة أوي

أي نوع من أنواع العزلة

قراءة - كمبيوتر - كتابة - في البلكونة

في المناسبات أحب القعاد مع الناس والكلام معاهم

خصوصاً الأطفال والناس الكبار

زهقت من الشباب بصراحة :)

وفي كل الأحوال بحب أنكش الناس حواليا ومحبش أسيب حد في حاله

بتعمل ايه في وقت فراغك؟

بقعد على مكتبي وأطلع النوتة وأكتب مذكراتي لو كنت في مود يسمح بالكتابة

الأكلة المفضلة ؟؟

بحب الملوخية بالوراثة من ماما

والمكرونة الاسباجيتي بفلفل كتير وجوزة الطيب وشطة

الصفات التي أخذتها من والدي ؟

العصبية أحياناً

جلسته لما يكون مركز أوي ويسند ذقنه على كفه مع اختلاف بسيط

حسن الإنصات

الاجتماعية

الصفات التي أخذتها من والدتي ؟

صوتها بس أمي صوتها فيه حنان أكثر

نظرة عينيها بس مش شكلها

بعض تعبيراتها في حاجات معينة

العاطفة الشديدة بس الفرق إني مدب وعاطفتي بتتحكم فيا عكسها

اكتر ست حاجات بتكرههم ؟

الكذب - الخيانة - التكبر والعجب بالنفس -العند وتنشيف الدماغ- الظلم -عدم العفو وشهوة الانتقام

لماذا دخلت عالم التوين من الاساس ؟

نفسي أعمل حاجة مفيدة واستغل نعمة الكتابة في شيء نافع

راجع التدوينة الأولى

أحلي جملة قيلت في وصف مدونتك ؟

هي مش جملة في صوف الدمونة ، هو تعليق حسيته خرج من القلب قوي

تعليق مها سامي على تدوينة أوراق مبعثرة :

أنا أيضا يا صديقتي أحب أن يحركني قلمي .. أو لأعيد صياغة هذه العبارة بمرادف لها .. أنا أحب أن تحرك أفكاري ومشاعري قلمي .. لهذا كم كنت أكره إمتحان التعبير في المدرسة .. لا أستطيع إستخراج أفكار أو أن أخط كلمات دون أن تصدر من عقلي وقلبي معا .. هم يحددون لنا الوقت والموضوع وهذا ما لا أطيقه

ده كان جزء من التعليق .. بس فعلاً حسيت إنها تخاطب روحي

اهمية التعليقات بالنسبة لك ؟

بتضيف ليا كتير ، وبتنبهني لمعاني جديدة

بانتظرها بفارغ الصبر بصراحة وباتضايق لما محدش يعبرني

بس مش بحب التعليقات الرسمية : حلو - جميل - كلام مؤثر

أحلي بوست كتبته ؟

على جناح الشوق يا حبيبي

كان خارج من قلبي فعلاً

وحسيت إنه فوقني الحمد لله

أفضل مدونة قراتها ؟

مدونة الدكتور أحمد الجعلي : ومضات

ومدونة مها سامي :فتات من كلام

الروابط هتلاقوها على ايديكوا اليمين

أفضل بوست قراته ؟

ليته يحبني

http://box--of--pandora.blogspot.com/2007/08/blog-post_24.html

الشغل بالنسبة لي ؟

إن جه أهلاً وسهلاً .. ماجاش بيتي أكرم لي

الانترنت بالنسبة لك ؟

إدمان

امرر التاج ده لمين ؟

أمرره لمها

http://www.blogger.com/profile/15369056589099694207

وإيمان سعد

http://www.blogger.com/profile/08072986900717338278

خلص التاجين ؟ أحمدك ياااااااااااارب

أنا تعبت والله